نسمة غلا

السلام عليكم ورحمة الله وبركاته


قصة قراتها في منتدى وعجبتني واكيد لها فائدة كبيرة للكل هي طويلة بس ياريت تقرونها


كااااااااااااااااااااااااااااااااااااااملة


----------------------------------

هكر بس طيب ..
<< يمكن صارت لبعضكم ويارب ماتصير لصديق هدفي منها التحذير حنا نسمع بس مانصدق لين نطيح بنفس الموقف :-

في ذات فجر جميل < كنت اسولف مع صديقتي على المسن < طبعآ مايك فأذا بالأيميل يقول تم تسجيل دخول من جهاز آخر < فر راسي وش القصه ؟ ..

رجعت فتحت الأيميل جاتني اضافه من ايميل ماعرفه حطيت منع دقايق وشفته قدامي ضاف نفسه غصب عرفت وقتها ان جهازي مخترق اسولف مع صديقتي عن اللي اشوفه اقولها شكله اخترقني جاني بمحادثه يقول ايه اخترقتك ومن شهر !!!

قفلت معي وسكرت الأيميل صارت تطلعلي مفكره على سطح المكتب منه يقول حتى لوسكرتي الأيميل انا مخترق جهازك وسجل محادثاتك وكل شي بجهازك عندي ومسجل لك مكالمات بالمايك ؟
< الحمدلله مالي صور بالجهاز ولا اي شي خاص لي بس مكالماتي مع صديقاتي بالمايك مسجلهن <

رجعت افتح الأيميل اشوف قصته قالي ابي اتعرف انا معاك من شهر وحفظت انفاسك اعرفك لاصرتي رايقه واعرفك لاتضايقتي ابي اكون صديق ومن شهر موجود بجهازك وعايش حياتك واظهرت نفسي الآن لأنك سولفتي مع خويتك عن الهكر وانا اسمعكم حبيت اعلمك وشو الهكر !!
_
بعدها ارسلي مقطع مسجل بصوتي !!
هنا بديت انهار وابكي < موعن شي بس مهما كان صعب تسمعين صوتك بيدين رجل غريب الموقف بحد ذاته قاتل والأسوء انه حصل بفترة ضغط نفسي بالنسبه لي وجاني جني الأمنيات وكمل الناقص هاها < بعدين اقولكم وشو جني الأمنيات ..

>
المهم وقتها تعبت وقعدت ابكي.. النكته يقولي لاتبكين اسمعك تكفين لاتبكين متعود اسمع ضحكتك واستهبالك < هذا كله بالرسايل الفوريه يسمعني وانا اراسله بالمحادثه < لحسة مخ صح بس هذا لأنه مخترق جهازي يسمعني ويسمع كل شي حولي بمجرد مافتح الجهاز < _ شوي الا اسمع صوت حمامه عند شباكي الا الحبيب يقول حلو صوت الحمام الفجر < < بغيت اشقق هدومي وقتها _

< لحظه نسيت شي جوالي جنبي يدق عاد يقولي ردي اسمع جوالك يدق والنغمه حلوه هاها
وانا مازلت اصيح ومصدومه هستر فيني الله يسامحه.. هنا بدئت طيبة الهكر الشرير تطفو على السطح < لاحضو الأخت تحاول تستخف دمها هذا كله عشان اهدي من رتم الموقف ع الأقل قدام نفسي لأنه موسهل علي تذكر تفاصيله < وين وقفنا ايه عند الطيبه والسطح < لاتستغربون تأثير الجغرافيا < < خلاص آخر مره اخرج عن النص < ايه هين < اللي يطلع كم قوس زي هذا < بالقصه له جائزه < يمه
خلاص برجع لسالفتي المهم يوم سمعني ابكي قالي روقي خلاص مسحت اللي عندي وانا حاضر للي تبين وتحت امرك انا جني الأمنيات تمني امنيه بصوت عالي شوفي احققها اولا ؟ مستعد اكون عين لك اكشف لك كل اللي حواليك لوتبين ادخل على الناس اللي بمسنك اخترق اجهزتهم واطلعلك بلاوي < < قلتله مشكور انت اطلع من جهازي بس ولك فائق الشكر والإحترام < تحريآ للمصداقيه آخر ثلاث كلمات انا زودتها اللحين من عندي < طبعآ قعد يحلف ويقسم انه مستعد لأي شي ويحاول يهدئ من روعي < حلوه لاتقولون < سألته كيف جاني من وين عرفني كيف دخل جهازي وايملي ؟ وهنا بيت القصيد والهدف من الموضوع كله مابي احد يطيح بنفس غلطتي يقول ان عنده برنامج يبحث عن الأجهزه اللي فيها منافذ مفتوحه على مستوى العالم ولقيت جهازك صدفه ودخلت من ثغرات جهازك < الثغرات هذي تجي نتيجة فيروسات هي اللي تفتح المنافذ بالجهاز < ومنها دخلت ونصبت ملفات التجسس بجهازك < بغض النظر عن صحة روايته من عدمها الآهم تأكيد رداءة برامج الحمايه حقات ام ريالين هاها قلتله انا عندي برنامج ( نود ) قوي كيف دخلت قالي معلومه اساسيه عندنا بالهكر قاعده تقول ماوضعت انظمة الحمايه الا لتخترق والبرنامج هذا ضعيف وقتها ذكرته بحديث الرسول صلى الله عليه وسلم من تتبع عورات الناس تتبع الله عورته ومن تتبع الله عورته فضحه ولو في عقر داره ) طلع الرجال فيه خير ومثقف وعنده نزعة دين كيف صار هكر الله اعلم اعترف ان ماقصده لي مضره بس تسليه وقال عشان اثبتلك بطلع الآن من جهازك واحذف ملفات التجسس اللي حطيتها وانا معاك < سألته سؤال جوهري دامك ماتبي مضرتي ليش سجلت صوتي ؟ قال عشان متى مانويت افاجئك واعلمك اني مخترق جهازك يكون عندي دليل على كلامي !!

بعدها اعتذر ووعدني انه مايدخل ابد..
سألته كيف احمي نفسي بعدين ومااتعرض للموقف هذا مره ثانيه نصحني بالنصائح التاليه < شفتو هكر بس طيب هاها < وانا طلبت نصيحته لأن اهل مكه ادرى بشعابها < وكني اشوف علامات استفهام تنور فوق رؤوس البعض < ياحبيلي يازين كلامي < تقولون كيف تثقين فيه وبنصايحه ؟ بقولكم تأكدت وطلع كلامه صحيح واللي عنده تعليق او اضافه ياليت يفيدنا ..

قال اول شي ركبي كاسبر 2009 ماحد يقدرله خطير ثانيآ لاتحملين اي شي من النت امتداده exe‏ لأنها غالبآ اما ملفات تجسس او فيروسات تفتح منافذ جهازك وتسهل الأختراق ثالثآ تحديث برنامج الحمايه بأستمرار من النت عشان يكشف الباتشات الجديده
وبعدها طلب مني اسامحه ووعدني مايكررها
الشاهد من القصه واوجه كلامي للبنات خاصه لاتحطون اي شي خاص بالجهاز لاصور لامعلومات ولا اي شي لاتضيفون احد ماتعرفونه لاتفتحون رسايل الأيميل والأهم والأخطر الكام اللي عندها كام تحط عليها لاصق اسود بحيث لو انفتحت مايطلع قدامه الا شاشه سودا وطبعآ اكيد سمعتو عن برامج تفتح كامك وانتي ماتدرين وقالها لي الهكر بنفسه يقول حاولت افتح كامك بس ماشفت شي الا ظلام لأني حاطه عليها لاصق ثقيل اسود وهذا اخطر شي بالموضوع من غير اختراق اي احد بالأيميل معك يقدر يفتح كامك بدون ماتدرين عن طريق برامج خاصه اخفي الكام وارتاحي وارجع واقول النت هذا بحر عمرك ماتوصل ساحله يبي حذر واستقامه والله يستر علينا وعلى بنات المسلمين عمومآ انا زيادة بالأطمئنان بس سويت فرمته كامله للجهاز ونفذت تعليمات الجني الرحوم

اللي ابيه منكم انكم تدعون بالله للهكر الطيب ان ربي يهديه ويبعده عن هالطريق يارب آمين آمين آمين هو وعدني انه يبعد عن هالسوالف الله يهديه ويهدينا الى مايحب ويرضا واشهدكم واشهد الله قبل اني سامحته من كل قلبي لانه مهما كان بالأخير طلع انسان شهم ومعدنه اصيل لو واحد غيره مايخاف الله وش كان صار ؟؟ ماقول الا يازين البلاستيشن بس قال نت قال ههههه
آسفه ع الأطاله وتوته توته خلصت الحدوته ..

< ملاحضه اخيره .. لامانع لدي من نشرها لآخذ الفائده والله لايحرمني ولايحرمكم اجرها لاني وربي مانزلتها الا لغرض التحذير وللبنات خاصه وتنبيه للي مازلوا داخل معمة التهكير واالترصد للناس او اللي استهوتهم القصه وحبو يعيدون بثها من جديد مع انسانه ثانيه بقولكم كلمه او بالأحرى آيه اختم فيها كلامي ( ولاتحسبن الله بغافل عما يعمل الظالمون ) هذا تجسس وترويع للآمنين يعني انا وحده فبيتي آمنه لاضريت احد ولاجيته اتعرض لموقف مثل هذا وربي للحين الروعه فيني ماراحت وتذكروا (كما تدين تدان )

[هُدَوْء أُنًثِى ـآأ ..~

تسلمين نسومه
قصة رووعه
*ودي ووردي*

_________________________________________________________

نسمة غلا

تسلمين انسانة على المرور نورتي ياقلبي

_________________________________________________________

مجنونه انا

تسلمين نسمه على القصة الرائعه

وهاذا القصه كي نستفاد منها لان الدنيا مالها امان اذا فيه هكر طيب فيه هكر خبيث ولها نياب بعد

تقبلي مروري وحترامي

_________________________________________________________

انتهت لحظاتى الجميلة بينكم كما ينتهى أى شئ جميل فى هذه الحياة بسرعه
وقد يزيد من قصر اللحظات الجميلة فى حياتنا ترقبنا للحظات الوداع بخوف منها ورجاء أن لا تكون قريبة
نودّها ابعد من تخيّلنا لبعدها
ولكن لابد من ان نصحو يوما على حقيقة الوداع التى هى من حقيقة الدنيا التى نعيشها
أحببتكم وأحببت تواجدى بينكم

مجنونه انا......

مساعد

اختي شكرا علي االافادة
ماقصرتي

_________________________________________________________